Úrræði

Björgin kann ekki að henta hverjum sem er. Ýmis önnur úrræði eru í boði á Suðurnesjunum.

Pétur Hauksson geðlæknir

Kemur flesta fimmtudaga til Reykjanesbæjar og er með aðstöðu í húsnæði Bjargarinnar. Hægt er að hafa samband við Pétur í síma 562-7272 eða í gegnum netfangið petur.hauksson@simnet.is.

Heilbrigðisstofnun Suðurnesja

Hlutverk heilsugæslunnar í geðheilbrigðismálum er að vera almennt fyrsti viðkomustaður vegna geðraskana og sinna meðferð og eftirfylgni. Ef þú átt við sálræna vanlíðan að etja, er fyrsta skrefið að hafa samband við heilsugæsluna sími: 422-0500 og panta viðtal hjá heilsugæslulækni eða símatíma í hjúkrunarmóttöku.

Geðteymi sálfélagsleg þjónusta

Á Heilbrigðisstofnun Suðurnesja eru starfrækt þrjú teymi sem sinna sálfélagslegri þjónustu: Geðheilsuteymi, geðteymi fullorðinna og forvarnar- og meðferðarteymi barna, sem starfa eftir stefnu og aðgerðaáætlun stjórnvalda í geðheilbrigðismálum. Geðteymin þjónusta skjólstæðinga HSS og nær þjónustan til allra sveitarfélaga á Suðurnesjum. Geðheilsuteymið er 2.línu þjónusta þar sem unnið er með geðvanda einstaklinga, 18. ára og eldri, út frá þverfaglegri aðkomu. Gert er ráð fyrir að þjónustan sé tímabundin. Tilvísun þarf að berast frá fagfólki í heilbrigðis- eða velferðarþjónustu með lýsingu á vanda og grun um geðgreiningu.

Sálfræðistofa Suðurnesja

Sálfræðistofa Suðurnesja býður upp á á meðferð og greiningu barna og fullorðinna. Ýmsar tegundir meðferða eru í boði, m.a. hugræn atferlismeðferð, núvitund, EMDR og samkenndarnálgun, allt eftir því hvað hentar fólki og þeim vanda sem vinna á með. Engum er synjað um þjónustu en það getur verið mislöng bið eftir sálfræðingum. Hægt er að hafa samband með því að senda tölvupóst á salsud@salsud.is eða í gegnum heimasíðu þeirra.

Félagsleg ráðgjöf sveitarfélaga

Markmið félagslegar ráðgjafar er að veita upplýsingar og leiðbeiningar um félagsleg réttindamál annars vegar og stuðning vegna félagslegs og persónulegs vanda hins vegar. Félagsleg ráðgjöf tekur m.a. til ráðgjafar á sviði fjármála, húsnæðismála, uppeldismála, skilnaðarmála, þar með talinna forsjár- og umgengnismála, ættleiðingarmála o.fl. Á Suðurnesjum er félagsþjónusta hjá Reykjanesbæ, Suðurnesjabæ og Grindavíkurbæ.

Frú Ragnheiður á Suðurnesjum

Verkefnið er skaðaminnkun sem miðar fyrst og fremst að því að draga úr heilsufarslegum, félagslegum og efnahagslegum afleiðingum notkunar vímuefna án þess að draga þó úr notkuninni sjálfri. Þá er helsta markmiðið að þjónusta fólk sem notar vímuefni í æð. Frú Ragnheiður á Suðurnesjum keyrir á mánudögum og fimmtudögum, og reynir alltaf að vera með einhverja næringu, hlýjan fatnað, teppi, svefnpoka og hreinan búnað, en einnig er fargað notuðum búnaði. Hægt er að hafa samband í síma 783-4747, á Facebook síðu þeirra eða á netfangið fruragnheidur.sudurnes@redcross.is.

Suðurhlíð

Suðurhlíð er miðstöð fyrir þolendur ofbeldis. Markmið er að veita stuðning, ráðgjöf og fræðslu um eðli og afleiðingar ofbeldis. Suðurhlíð býður áfallamiðaða ráðgjöf, stuðning og upplýsingar fyrir þolendur ofbeldis af öllum kynjum, 18 ára og eldri. Hjá Suðurhlíð er unnið með þolendum ofbeldis á þeirra forsendum. Öll þjónusta og ráðgjöf er undir sama þaki með það að markmiði að auðvelda þolendum að leita sér aðstoðar. Suðurhlíð leggur áherslu á þverfaglega samvinnu mismunandi stofnanna og samtaka sem koma að vinnu á staðnum. Brotaþola er mætt í hlýlegu og öruggu umhverfi, á þeirra forsendum og einstaklingum að kostnaðarlausu. Hægt er að hafa samband í síma 591-7085 eða á netfangið sudurhlid@sudurhlid.is.

Fjölsmiðjan

Fjölsmiðjan er starfsþjálfunarsetur fyrir ungt fólk á aldrinum 16-24 ára, þar er rekið bæði nytjamarkað, reiðhjólaverkstæði og mötuneyti, og sinnt ungu fólki sem hefur lent í óvirkni út af einhverjum orsökum. Einstaklingarnir koma til Fjölsmiðjunnar í gegnum Vinnumálastofnun eða félagsþjónustu sveitarfélaganna á Suðurnesjum og eru tekin í vinnuþjálfun sem er mjög fjölbreytt, allt frá því að vinna á reiðhjólaverkstæðinu, sækja vörur sem fólk vill gefa til nytjamarkaðarins, fara yfir vörurnar, farið er yfir öll rafmagnstæki og svo er unnið í mötuneytinu þar sem boðið er upp á morgun- og hádegismat. Lögð er áhersla á að allir leggist á eitt og hjálpist að, allir ganga í öll störf, þannig verður vinnan fjölbreytt og einstaklingar finna hvar þeirra styrkleikar liggja. Fjölsmiðjan skilar venjulega átta til tíu einstaklingum út á vinnumarkaðinn og út í lífið á hverju ári, fólk sem fer þá af bótum og skilar sínu til samfélagsins. Hægt er að hafa samband í síma 544-4080.

Virkjun Mannauðs

Virkjun mannauðs í Reykjanesbæ er tómstunda- og félagsmiðstöð fyrir 18 ára og eldri. Margvísleg afþreying er í boði fyrir áhugasama, hvort sem fólk sé í atvinnuleit eða ekki. Þar má finna öflugt smíðaverkstæði, föndurherbergi með aðstöðu til þess að mála og prjóna og kaffiaðstöðu, auk þess sem reglulega er keppt í billjard og pílukasti. Þá hefur Bridge-félag Reykjanesbæjar og Flugmódelklúbburinn aðstöðu í húsnæðinu. Hægt er að hafa samband í síma 824-1280.

Hjálpræðisherinn í Reykjanesbær

Hjálpræðisherinn í Reykjanesbæ er með glæsilega verslun þar sem selt er second hand, HERTEX. Virkninámskeið. Boðið er upp á mat í hádeginu alla virka daga. Mataraðstoð gegn matarsóun unnið í samvinnu með Samkaup. Virkninámskeiðin eru unnin í samvinnu með Reykjanesbæ sem og öðrum sveitarfélögum á Suðurnesjunum, Vinnumálastofun og Heilbrigðisstofnunum. Hægt er að hafa samband í síma 556-0300.